واقعے کے بعد شہریوں نے فوری مداخلت کرتے ہوئے زخمی جانور کو طبی امداد دلوانے کی کوشش کی، جبکہ پولیس نے موقع پر پہنچ کر واقعے کی ابتدائی تحقیقات شروع کر دی ہیں

اٹک: ٹینٹ میں جانور باندھنے پر تنازع، مشتعل شخص کا قربانی کے بیل پر چھرے سے حملہ

اٹک: حاجی شاہ روڈ پر واقع مویشی منڈی میں افسوسناک واقعہ پیش آیا جہاں ٹینٹ میں جانور باندھنے کے تنازع پر ایک شخص نے قربانی کے لیے لائے گئے بیل پر چھرے سے حملہ کر کے شدید زخمی کر دیا۔

تفصیلات کے مطابق، فیصل نامی شخص نے اس وقت طیش میں آ کر حملہ کیا جب بیوپاری نے قیمتی بیل کو فیصل کے ٹینٹ کے قریب باندھ دیا۔ فیصل نے چھری کے وار کر کے بیل کو زخمی کر دیا، جو کہ لیہ سے قربانی کے لیے لایا گیا تھا۔

متاثرہ بیوپاری نے تھانہ اٹک خورد میں مقدمہ درج کروا دیا ہے۔ ایف آئی آر کے مطابق زخمی بیل کی قیمت تقریباً 7 لاکھ روپے بتائی گئی ہے۔ درخواست میں مؤقف اختیار کیا گیا ہے کہ فیصل نے ذاتی رنجش یا انا کی بنیاد پر جانور کو نشانہ بنایا۔

پولیس نے مقدمہ درج کر کے کارروائی شروع کر دی ہے، تاہم تاحال ملزم کی گرفتاری عمل میں نہیں آ سکی۔