آم کو پھلوں کا بادشاہ یوں ہی نہیں کہا جاتا، اس کا ذائقہ ایسا دلکش ہوتا ہے کہ ایک بار کھانے کے بعد بار بار دل للچاتا ہے

روزانہ کتنے آم کھانا صحت کے لیے بہتر ہے؟

ماہرین کی رائے

جیسے ہی گرمیوں کا موسم آتا ہے، بازاروں میں آموں کے ڈھیر لگ جاتے ہیں جنہیں دیکھ کر ہی منہ میں پانی آ جاتا ہے۔ آم نہ صرف ذائقے میں لاجواب ہوتا ہے بلکہ صحت کے لیے بھی بے شمار فوائد کا حامل ہے۔

آم میں قدرتی مٹھاس کی مقدار زیادہ ہوتی ہے، مگر یہ چینی سے مختلف ہوتی ہے کیونکہ اس میں فائبر اور دیگر غذائی اجزاء بھی شامل ہوتے ہیں، جو اسے نسبتاً متوازن بناتے ہیں۔ تاہم یہی مٹھاس ذیابیطس کے مریضوں کے لیے تشویش کا باعث بن سکتی ہے، کیونکہ یہ بلڈ شوگر لیول کو متاثر کر سکتی ہے۔

تو سوال یہ ہے کہ: روزانہ کتنے آم کھانے چاہئیں؟

طبی ماہرین کے مطابق آم میں فائبر کی مقدار دیگر پھلوں کے مقابلے میں کم اور قدرتی مٹھاس زیادہ ہوتی ہے، اس لیے

صحت مند افراد کو روزانہ 1.5 سے 2 کپ (تقریباً 330 گرام) سے زیادہ آم کھانے سے گریز کرنا چاہیے۔ اعتدال کا دامن تھامنا یہاں بھی ضروری ہے۔

جہاں تک ذیابیطس کے مریضوں کا تعلق ہے، وہ بھی آم سے لطف اندوز ہو سکتے ہیں، مگر محدود مقدار میں۔ ماہرین کے مطابق ایسے افراد دن میں دو چھوٹے سلائس سے زیادہ نہ کھائیں اور آم کھانے کے بعد بلڈ شوگر لیول کو چیک کریں تاکہ جسم کا ردعمل جانچا جا سکے۔ اس کے بعد ہی آئندہ مقدار کا فیصلہ بہتر انداز میں کیا جا سکتا ہے۔

آم میں موجود غذائی اجزاء

ایک درمیانے سائز کے آم سے جسم کو درج ذیل غذائی اجزاء حاصل ہوتے ہی

• وٹامن C (مدافعتی نظام کو مضبوط بنانے اور آئرن کے جذب میں مدد)

• وٹامن A، B6، E، اور K

• کاپر، فولیٹ، پوٹاشیم، میگنیشیم، ریبوفلوین

• قدرتی مٹھاس، کاربوہائیڈریٹس، فائبر اور پروٹین

یہ تمام اجزاء مجموعی صحت، خلیاتی فعالیت اور نظامِ ہاضمہ کو بہتر بنانے میں مدد دیتے ہیں۔