اسلام آباد: وفاقی وزیر داخلہ محسن نقوی نے عید الاضحیٰ کے موقع پر اسلام آباد کے ایکسپریس وے پر قائم بکر منڈی کا دورہ کیا اور منڈی میں بیوپاریوں اور شہریوں کے لیے فراہم کی جانے والی سہولیات کا جائزہ لیا۔

وزیر داخلہ نے پارکنگ کے لیے مناسب جگہ مختص کرنے کا حکم دیا اور فی جانور فیس میں مناسب کمی کرنے کی ہدایت کی۔ انہوں نے بکر منڈی میں صفائی کے انتظامات کا بھی معائنہ کیا۔
محسن نقوی نے ملک کے مختلف حصوں سے آئے بیوپاریوں سے ملاقات کی اور ان سے انتظامات کے متعلق دریافت کیا۔ بیوپاریوں کی درخواست پر انہوں نے مویشی منڈی کے لیے جگہ وسیع کرنے کا فوری حکم دیا۔
انہوں نے منڈی میں لائٹنگ اور پانی کی وافر فراہمی کو یقینی بنانے کی بھی ہدایت کی۔ بیوپاریوں نے وزیر داخلہ کو بتایا کہ ابھی تک گاہک کم آ رہے ہیں اور موسم کی شدت کی وجہ سے زیادہ تر لوگ شام اور رات کو منڈی کا رخ کرتے ہیں۔

وزیر داخلہ نے منڈی میں ایک سفید بیل میں خصوصی دلچسپی لی اور اس کی خوبصورتی کی تعریف کی۔ بیوپاری نے بتایا کہ اس بیل کی قیمت 18 لاکھ روپے ہے اور اس کا وزن 14 من سے زائد ہے۔محسن نقوی نے منڈی میں آئے شہریوں سے بھی ملاقات کی اور ان کی درخواست پر منڈی سے ملحقہ کراسنگ پل کی فوری مرمت کا حکم دیا۔