وفاقی حکومت عوام کو ریلیف فراہم کرنے کے لیے قرض لینے پر مجبور ہے، تاہم پائیدار اقتصادی استحکام کے لیے اخراجات �

اسلام آباد: وفاقی وزیر خزانہ محمد اورنگزیب نے کہا ہے کہ مالی وسائل کی محدود دستیابی کے باوجود حکومت عوام کو ریلیف فراہم کرنے کے لیے قرض لینے پر مجبور ہے، تاہم پائیدار اقتصادی بہتری کے لیے اخراجات میں کمی اب ناگزیر ہو چکی ہے۔
وہ بجٹ کے بعد پریس کانفرنس سے خطاب کر رہے تھے، جو اس وقت کشیدگی کا شکار ہو گئی جب صحافیوں نے بعض امور پر احتجاج کرتے ہوئے واک آؤٹ کر دیا۔

صحافیوں کا کہنا تھا کہ بجٹ کے حوالے سے ایف بی آر کی جانب سے تکنیکی بریفنگ نہ دیے جانے کے باعث انہیں ٹیکس اور دیگر مالیاتی امور کی رپورٹنگ میں دشواری کا سامنا ہے۔ ان کے مطابق یہ اقدام شفافیت کی کمی کی عکاسی کرتا ہے۔

محمد اورنگزیب نے کہا کہ گزشتہ روز قومی اسمبلی میں پیش کیے گئے بجٹ میں توانائی اصلاحات، پنشن سسٹم میں بہتری، اور ٹیکس اصلاحات پر خصوصی توجہ دی گئی ہے۔ انہوں نے کہا کہ 4 ہزار سے زائد ٹیرف لائنز پر کسٹم ڈیوٹی ختم کی گئی ہے تاکہ برآمدات کو فروغ دیا جا سکے۔

انہوں نے بتایا کہ بجٹ میں تنخواہ دار طبقے کو ممکنہ ریلیف فراہم کرنے کی کوشش کی گئی ہے جبکہ سپر ٹیکس میں کمی اور چھوٹے کسانوں کو آسان شرائط پر قرض فراہم کرنے کا منصوبہ بھی شامل ہے۔ ان کے مطابق کھاد اور پیسٹی سائیڈز پر ٹیکس لگانے کی تجویز واپس لے لی گئی ہے تاکہ زرعی شعبے پر بوجھ نہ پڑے۔

وزیر خزانہ نے تسلیم کیا کہ مالی حالات کے پیش نظر اضافی ٹیکسز لگانا مجبوری ہے، تاہم حکومت نے اس بوجھ کو منصفانہ طور پر تقسیم کرنے کی کوشش کی ہے۔ ان کا کہنا تھا کہ زیادہ آمدن والے ملازمین پر بھاری ٹیکس نافذ کیا گیا ہے جبکہ کم آمدن والے طبقے کو رعایت دی گئی ہے۔

انہوں نے کہا کہ حکومت نے مالی سال 2025-26 کے لیے ٹیکس ٹو جی ڈی پی کی شرح 10.3 فیصد مقرر کی ہے اور آئندہ سال اس میں مزید اضافہ کر کے 10.9 فیصد تک لے جانے کا ہدف ہے۔ اس سال 2.2 ٹریلین روپے کی ٹیکس وصولی متوقع ہے جس میں سے 312 ارب روپے اضافی ٹیکس کی مد میں ہوں گے۔

وفاقی وزیر خزانہ نے کہا کہ اخراجات میں کمی کی پالیسی اپناتے ہوئے رواں سال صرف دو فیصد اضافہ کیا گیا ہے۔ پنشن سسٹم کو کنٹری بیوٹری بیسڈ انڈیکس سے منسلک کر دیا گیا ہے تاکہ یہ نظام پائیدار اور قابلِ عمل ہو۔

وزیر خزانہ نے وضاحت کی کہ آن لائن اور فارمل ریٹیل سیکٹر پر یکساں ٹیکس پالیسی اپنائی گئی ہے تاکہ مارکیٹ میں توازن قائم رہے۔ انہوں نے کہا کہ زراعت پر ٹیکس لگانے کا مطالبہ آئی ایم ایف کی جانب سے تھا، لیکن حکومت نے کسانوں کے مفاد میں اس فیصلے کو مؤخر کر دیا ہے۔

تنخواہوں میں اضافے کے سوال پر وزیر خزانہ نے کہا کہ وزراء اور پارلیمنٹیرینز کی تنخواہوں میں آخری بار 2016 میں اضافہ کیا گیا تھا، اگر سالانہ بنیاد پر معمولی اضافہ کیا جاتا تو آج یکدم اضافے کا تاثر پیدا نہ ہوتا۔

وزیر خزانہ نے عندیہ دیا کہ چھوٹے گھروں کے لیے مورگیج قرض اسکیم جلد متعارف کرائی جائے گی۔ اس کے تحت 5 مرلہ یا اس سے کم رقبے کے گھر بنانے والوں کو آسان شرائط پر قرض دیا جائے گا۔

انہوں نے واضح کیا کہ پاکستان کو قرض کی بنیاد پر معیشت نہیں چلانی چاہیے۔ اگر ہم ہر بار قرض لے کر اخراجات پورے کریں گے تو خسارہ بڑھتا جائے گا۔ اصلاحات اور مالی نظم و ضبط ہی پائیدار ترقی کی ضمانت ہیں۔