اسلام آباد — وزیر اعلیٰ سندھ مراد علی شاہ اور چیئرمین پاکستان کرکٹ بورڈ (پی سی بی) محسن نقوی کے درمیان ملاقات ہوئی

جس میں سندھ میں کرکٹ کے فروغ، میچز کے انعقاد اور سٹیڈیمز کی تعمیر نو کے امور پر تفصیلی گفتگو ہوئی۔

ملاقات میں نیاز سٹیڈیم حیدرآباد کی عالمی معیار کے مطابق اپ گریڈیشن کا فیصلہ کیا گیا ہے، جس کے بعد 17 برسوں کے وقفے کے بعد یہاں انٹرنیشنل میچز کا انعقاد ممکن ہوگا۔ محسن نقوی نے کہا کہ رواں برس ہی نیاز سٹیڈیم میں انٹرنیشنل میچ کے انعقاد کی کوشش کی جائے گی۔ پی سی بی کی ٹیم آئندہ ہفتے نیاز سٹیڈیم کا دورہ کرے گی تاکہ تمام سہولتوں کا جائزہ لیا جا سکے۔

وزیر اعلیٰ سندھ مراد علی شاہ نے بتایا کہ صدر آصف زرداری کی ہدایت پر سندھ حکومت کے تعاون سے نیاز سٹیڈیم کی انٹرنیشنل معیار کی اپ گریڈیشن کی جائے گی اور سہولتوں کو بہتر بنایا جائے گا۔ محسن نقوی نے بتایا کہ کرکٹ کے نئے وینیوز پر کام جاری ہے اور حیدرآباد اور فیصل آباد میں بین الاقوامی کرکٹ کی بحالی پہلی ترجیح ہے۔

یاد رہے کہ نیاز سٹیڈیم حیدرآباد میں آخری بین الاقوامی ون ڈے میچ 2008 میں پاکستان اور زمبابوے کے درمیان کھیلا گیا تھا۔

اس موقع پر سندھ کے صوبائی وزیر جام خان شورو اور پی سی بی کے چیف آپریٹنگ آفیسر سمیر احمد بھی موجود تھے۔