بھارتی میڈیا کا ریاستی پراپیگنڈا بے نقاب: عالمی اداروں کے ہوش رُبا انکشافات

بین الاقوامی میڈیا رپورٹس کے مطابق بھارتی میڈیا نے بی جے پی حکومت کے اشارے پر جھوٹی جنگی خبریں پھیلائیں۔ ان میں جھڑپوں، بغاوتوں، بمباریوں اور فتوحات جیسے دعوے شامل تھے، جن کا زمینی حقائق سے کوئی تعلق نہیں تھا۔ فرضی ویڈیوز، ویڈیو گیمز کے مناظر، اور غیر ملکی تنازعات کی فوٹیجز کو ایڈیٹ کر کے خبریں بنا کر پیش کیا گیا۔ عالمی اداروں کا کہنا ہے کہ یہ صحافت نہیں بلکہ ریاستی سرپرستی میں تیار کردہ فکشن تھا، جس کا مقصد عوام کو گمراہ کرنا اور خطے کی کشیدگی کو سیاسی فائدے میں بدلنا تھا۔

اہم انکشافات:

• واشنگٹن پوسٹ کے مطابق بھارتی میڈیا نے پاکستان سے جھڑپوں کے دوران فرضی جنگی کوریج پیش کی۔ فلاڈیلفیا میں ہونے والے طیارہ حادثے اور ویڈیو گیمز کے مناظر کو "پاکستان پر بھارتی حملے" کے طور پر نشر کیا گیا۔

• بھارتی چینلز جیسے زی نیوز، این ڈی ٹی وی، آج تک اور ٹائمز ناؤ نے غزہ، سوڈان اور دیگر ممالک کی فوٹیج کو پاکستان ظاہر کر کے پیش کیا۔ بعض چینلز نے جھوٹا دعویٰ کیا کہ "کراچی پر حملہ ہو چکا ہے" اور "پاکستانی وزیراعظم نے ہتھیار ڈال دیے ہیں"— حالانکہ ایسی کسی بھی خبر کی کوئی بنیاد نہ تھی۔

• بھارتی بحریہ اور فضائیہ نے کسی بھی حملے کی تصدیق نہیں کی، اس کے باوجود نیوز چینلز نے من گھڑت دعوے نشر کیے۔ متعدد ریٹائرڈ فوجی افسران کو بطور تجزیہ کار پیش کر کے جھوٹ کو سچ ثابت کرنے کی کوشش کی گئی۔

• واٹس ایپ گروپس سے جعلی "لیکس" اینکرز تک پہنچائے گئے، اور بغیر کسی تصدیق کے انہیں ہیڈ لائنز میں شامل کیا گیا۔ واشنگٹن پوسٹ نے تبصرہ کیا کہ بھارتی ٹی وی چینلز اب "جھوٹی کہانیاں گھڑنے والوں کے قبضے میں ہیں"۔

• ریاستی پروپیگنڈے نے سچائی کو پسِ پشت ڈال دیا۔ بھارتی وزیر خارجہ جے شنکر خاموش رہے، اور وزیر اعظم نریندر مودی نے سیز فائر کے دو دن بعد خاموشی توڑی، مگر اس دوران جھوٹ کو حقیقت کا روپ دیا جاتا رہا۔

• عالمی سطح پر بھارت کی ساکھ کو نقصان پہنچا۔ ایک بھارتی سیکیورٹی افسر نے اعتراف کیا کہ "جھوٹی معلومات ایک حکمت عملی تھی، لیکن اس کا اصل نقصان بھارتی عوام کو ہوا۔"

بین الاقوامی میڈیا کی تحقیقاتی رپورٹس:

نیویارک ٹائمز، واشنگٹن پوسٹ، روئٹرز، ٹی آر ٹی، الجزیرہ اور بی بی سی سمیت متعدد معتبر عالمی اداروں نے بھارتی میڈیا اور حکومت کی گمراہ کن مہم کو بے نقاب کیا۔ ان رپورٹس میں بھارتی ریاستی بیانیے اور اس کے تحت چلنے والے چینلز کی غیر ذمہ دارانہ صحافت پر شدید تنقید کی گئی۔

آزادی صحافت پر قدغنیں:

مودی حکومت نے ان انکشافات کے بعد شدید ردِ عمل دیا۔ بی بی سی، ٹی آر ٹی اور دیگر بین الاقوامی اداروں پر بھارت میں پابندیاں عائد کی گئیں، مقامی صحافیوں کو گرفتار کیا گیا اور ان کے خلاف مقدمات قائم کیے گئے۔ جو کوئی بھی بی جے پی کے بیانیے کے خلاف بولا، اسے یا تو گرفتار کر لیا گیا یا خاموش کرا دیا گیا۔

پاکستانی میڈیا کی پیشہ ورانہ ساکھ:

عالمی اداروں نے اس بحران میں پاکستانی میڈیا کی پیشہ ورانہ شفافیت کو سراہا، جس نے بغیر کسی سنسنی کے مصدقہ معلومات فراہم کیں اور افواہوں سے گریز کیا۔