پاکستان میں شرحِ خواندگی کی تشویشناک صورتحال

پاکستان میں شرح خواندگی کی صورتحال انتہائی تشویشناک ہے۔ ملک بھر میں صرف 60.6 فیصد افراد خواندہ ہیں، جن میں مردوں کی شرح 68 فیصد جبکہ خواتین کی شرح صرف 52.8 فیصد ہے۔ اسکولوں میں بچوں کے داخلے کم ہو رہے ہیں اور تعلیمی اداروں کی حالت دن بدن ابتر ہوتی جا رہی ہے۔

اقتصادی سروے 2024 کے مطابق، تعلیم کے شعبے کو جی ڈی پی کا صرف 0.8 فیصد حصہ دیا گیا، جو کہ ایک ترقی پذیر ملک کے لیے ناکافی ہے۔ 3 سے 5 سال کی عمر کے بچوں کے اسکولوں میں داخلے کی شرح میں 3.3 فیصد کمی واقع ہوئی۔ 2023 میں ایک کروڑ 70 لاکھ 77 ہزار بچوں نے اسکولوں میں داخلہ لیا تھا، جبکہ 2024 میں یہ تعداد کم ہو کر ایک کروڑ 16 لاکھ رہ گئی۔

ملک کے بیشتر تعلیمی ادارے بنیادی سہولیات سے محروم ہیں۔ تقریباً 23 فیصد اسکولوں میں بجلی کی سہولت موجود نہیں، جبکہ بلوچستان کے اسکول سب سے زیادہ متاثر ہیں۔ مجموعی طور پر 24 فیصد اسکولوں میں پینے کے صاف پانی کی سہولت دستیاب نہیں اور 22 فیصد اسکولوں میں ٹوائلٹ کی سہولت میسر نہیں۔

اقتصادی سروے کے مطابق، وفاقی دارالحکومت اور پنجاب کے اسکولوں میں بنیادی سہولیات کی فراہمی نسبتاً بہتر ہے، لیکن سندھ میں تعلیمی ادارے شدید مسائل کا شکار ہیں، جہاں سہولیات کی کمی نمایاں طور پر دیکھی گئی ہے۔