اسلام آباد (رائیس الااخبارتازہ ترین۔ 10 جون 2025ء)
پاکستان تحریک انصاف نے قومی اسمبلی کے بجٹ اجلاس کے موقع پر مؤثر احتجاج کی تیاری مکمل کر لی ہے۔ میڈیا رپورٹس کے مطابق پی ٹی آئی کی جانب سے پارلیمنٹ کے اندر اور ممکنہ طور پر باہر بھرپور احتجاج کی حکمت عملی ترتیب دے دی گئی ہے۔ ذرائع کا کہنا ہے کہ پارٹی قیادت نے ارکانِ پارلیمنٹ کو بجٹ اجلاس میں لازمی شرکت کی ہدایت جاری کر دی ہے۔

پارٹی ذرائع کے مطابق بجٹ کے خلاف آواز بلند کرنے کے لیے جامع لائحہ عمل تیار کیا گیا ہے، اور اگر ضرورت پڑی تو سڑکوں پر بھی احتجاج کیا جا سکتا ہے۔

چیئرمین تحریک انصاف بیرسٹر گوہر علی خان نے اس حوالے سے کہا ہے کہ پی ٹی آئی اس بجٹ کو کسی صورت تسلیم نہیں کرے گی۔ ان کا کہنا تھا کہ بجٹ میں مہنگائی پر قابو پانے یا کفایت شعاری سے متعلق کوئی واضح حکمت عملی نہیں دی گئی، جبکہ حکومت نے معاشی اصلاحات کے لیے بھی کوئی سنجیدہ قدم نہیں اٹھایا۔ انہوں نے کہا کہ معیشت پہلے ہی نازک صورتحال میں ہے اور موجودہ مالی پالیسیوں میں بہتری کا کوئی امکان دکھائی نہیں دیتا۔

دوسری جانب قومی اسمبلی اور سینیٹ کے بجٹ اجلاس آج طلب کر لیے گئے ہیں۔ سپیکر قومی اسمبلی سردار ایاز صادق کی زیر صدارت اجلاس شام 5 بجے ہوگا جس کا چار نکاتی ایجنڈا جاری کر دیا گیا ہے۔ وفاقی وزیر خزانہ محمد اورنگزیب آئندہ مالی سال 2025-26ء کا 17 ہزار 600 ارب روپے کا بجٹ پیش کریں گے۔

بجٹ پیش کرنے سے قبل شام 4 بجے وزیراعظم شہباز شریف کی زیر صدارت وفاقی کابینہ کا خصوصی اجلاس ہوگا جس میں بجٹ مسودے کے علاوہ سرکاری ملازمین کی تنخواہوں اور پنشن میں اضافے کی منظوری دی جائے گی۔ سینیٹ کا اجلاس بھی آج شام 6 بجے طلب کیا گیا ہے، جہاں وزیر خزانہ محمد اورنگزیب ایوان بالا میں بجٹ دستاویزات پیش کریں گے۔