بجلی مزید مہنگی ہونے کا امکان، صارفین پر نیا بوجھ ڈالنے کی تیاری

نئے مالی سال کے بجٹ میں حکومت نے فیصلہ کیا ہے کہ بجلی استعمال کرنے والوں پر اضافی سرچارج (اضافی فیس) لگائی جائے گی، جس سے بجلی مزید مہنگی ہو سکتی ہے۔

گزشتہ روز حکومت نے مالی سال 2025-26 کا بجٹ قومی اسمبلی میں پیش کیا۔ اس بجٹ میں بجلی کے بلوں پر عوام سے زیادہ رقم لینے کی منصوبہ بندی کی جا رہی ہے۔

ذرائع کا کہنا ہے کہ حکومت بجلی کے بلوں پر لگنے والے سرچارج کی موجودہ حد (10 فیصد) ختم کرنا چاہتی ہے، اور اس مقصد کے لیے نیپرا قانون میں تبدیلی کا منصوبہ بنایا گیا ہے۔ اس تبدیلی کے بعد حکومت کسی بھی وقت، اور مخصوص حالات میں، بجلی کے بلوں میں مزید اضافہ کر سکے گی۔

بتایا گیا ہے کہ حکومت فی یونٹ بجلی پر 3 روپے 23 پیسے تک کا اضافی سرچارج لینے کی تجویز پر غور کر رہی ہے، مگر ابھی تک اس پر کوئی حتمی فیصلہ نہیں ہوا۔

اس قانون میں ترمیم کے بعد حکومت جب چاہے، بجٹ یا مالی ضرورت کے مطابق، بلوں میں اضافی فیس لگا سکے گی، جس سے عام لوگوں پر مہنگائی کا دباؤ اور زیادہ بڑھنے کا خدشہ ہے۔

ماضی میں بھی حکومت بجلی کے بلوں پر لگائے گئے سرچارج سے گردشی قرضوں کے سود کی ادائیگی کرتی رہی ہے۔ اب حکومت نے ایک بار پھر گردشی قرضہ کم کرنے کے لیے 1275 ارب روپے قرض لینے کا منصوبہ بنایا ہے۔ یہ قرض بینکوں سے لیا جائے گا اور پھر یہ رقم آئندہ 6 سال میں عوام سے بلوں کے ذریعے واپس لی جائے گی۔

توانائی کے ماہرین کا کہنا ہے کہ اگر نیپرا کے قانون میں یہ تبدیلی ہو گئی، تو حکومت کو بار بار بجلی مہنگی کرنے کا قانونی اختیار مل جائے گا، جس سے مہنگائی اور عام آدمی کی مشکلات میں اضافہ ہو سکتا ہے