بیجنگ : چین نے ایران کی خودمختاری کی خلاف ورزی کی مخالفت کرتے ہوئے اسرائیل کے حملوں پر گہری تشویش کا اظہار کیا ہے۔ ترجمان لین جیان کا کہنا ہے کہ کشیدگی میں اضافہ کسی کے مفاد میں نہیں، فریقین امن و استحکام کے لیے اقدامات کریں۔

چینی وزارتِ خارجہ کے ترجمان نے کہا ہے کہ چین اس کشیدہ صورتحال کو کم کرنے اور خطے میں امن و استحکام قائم رکھنے کے لیے تعمیری کردار ادا کرنے کو تیار ہے۔ انہوں نے فریقین سے اپیل کی کہ وہ تنازعات کو مذاکرات اور بات چیت کے ذریعے حل کریں تاکہ خطے میں مزید کشیدگی پیدا نہ ہو۔

اسی دوران، ترک وزارتِ خارجہ نے بھی ایران پر اسرائیلی حملے کی شدید مذمت کی ہے۔ ترک حکومت نے بین الاقوامی قوانین کی خلاف ورزی قرار دیتے ہوئے کہا ہے کہ اس قسم کے حملے خطے میں امن و سلامتی کے لیے سنگین خطرہ ہیں اور عالمی برادری کو فوری طور پر موثر اقدامات کرنا چاہئیں تاکہ صورت حال مزید خراب ہونے سے بچائی جا سکے۔