ڈونلڈ ٹرمپ کی ایران کو سنگین دھمکی:اب بھی وقت ہے معاہدہ کرلو، ورنہ تباہی یقینی ہے

واشنگٹن: سابق امریکی صدر ڈونلڈ ٹرمپ نے ایران کو خبردار کیا ہے کہ اگر جوہری معاہدہ نہ کیا گیا تو آئندہ حملے پہلے سے کہیں زیادہ شدید اور تباہ کن ہوں گے۔ 

واشنگٹن: سابق امریکی صدر ڈونلڈ ٹرمپ نے ایک سخت بیان دیتے ہوئے ایران کو واضح الفاظ میں خبردار کیا ہے کہ اگر ایران نے جوہری معاہدے پر رضامندی ظاہر نہ کی، تو آئندہ حملے نہ صرف پہلے سے کہیں زیادہ شدید بلکہ "وحشیانہ" نوعیت کے ہوں گے۔ ٹرمپ کے اس بیان نے خطے میں پہلے سے کشیدہ صورتحال کو مزید تشویشناک بنا دیا ہے۔

معاہدہ نہ ہونے پر افسوس کا اظہار

غیر ملکی میڈیا رپورٹس کے مطابق ٹرمپ نے کہا کہ انہوں نے ایران کو پہلے ہی مشورہ دیا تھا کہ جوہری معاہدہ کر لے، لیکن ایرانی قیادت نے اس موقع کو گنوا دیا۔ ان کا کہنا تھا کہ مذاکرات کے دوران دونوں فریقین معاہدے کے قریب پہنچ گئے تھے، لیکن وہ معاہدہ آخرکار طے نہ ہو سکا۔

ایران کے سخت گیر عناصر پر تنقید

ڈونلڈ ٹرمپ نے ایرانی حکومت کے سخت گیر عناصر کو تنقید کا نشانہ بناتے ہوئے کہا کہ "ایران کے کچھ سخت گیر عہدیدار بہادری سے بات کرتے تھے، لیکن وہ نہیں جانتے تھے کہ ان کے ساتھ کیا ہونے والا ہے۔" ان کا دعویٰ تھا کہ "اب وہ تمام سخت گیر ایرانی ختم ہو چکے ہیں، اور جو کچھ آگے آنے والا ہے وہ اس سے بھی بدتر ہوگا۔"