تل ابیب : اسرائیلی اخبار کے مطابق تہران پر حملہ ایران کے اندر سے ہوا، موساد نے وہاں ڈرون بیس قائم کر کے زمین سے زمین تک مار کرنے والے میزائل لانچرز کو ایک ہی رات میں نشانہ بنایا۔

رپورٹ کے مطابق، اسرائیلی انٹیلی جنس ایجنسی موساد نے تہران کے قریب ایک خفیہ ڈرون بیس قائم کیا ہے، جہاں سے ایران کے ایٹمی تنصیبات اور عسکری اہداف پر حملوں کی کئی سالوں سے منصوبہ بندی کی گئی تھی۔ اس منصوبے کے تحت موساد کمانڈوز اور حساس ہائی ٹیک آلات ایران میں خفیہ طور پر اسمگل کیے گئے، تاکہ کارروائی کو کامیابی سے انجام دیا جا سکے۔

موساد اور اسرائیل ڈیفنس فورس (آئی ڈی ایف) نے مشترکہ طور پر اس حساس آپریشن کو مکمل کیا، جس میں جدید ڈرونز کا استعمال کرتے ہوئے زمین سے زمین تک مار کرنے والے میزائل لانچرز اور دیگر اہم اہداف کو نشانہ بنایا گیا۔

اسرائیلی حملے کی شدت اور منصوبہ بندی کا اندازہ اس بات سے لگایا جا سکتا ہے کہ اس کارروائی میں ایران کے اعلیٰ عسکری و سائنسی شخصیات بھی ہلاک ہوئیں۔ حملے میں ایرانی آرمی چیف جنرل محمد باقری اور پاسدارانِ انقلاب کے سربراہ جنرل حسین سلامی سمیت کئی اہم کمانڈرز شہید ہوئے۔

ایرانی میڈیا نے تصدیق کی ہے کہ اس حملے میں ایران کے 6 معروف ایٹمی سائنسدان بھی مارے گئے ہیں جن میں مہدی تہرانچی، فریدون عباسی، مطلبی زادہ، عبدالحمید منوچہر، احمد رضا ذوفقاری، اور سید امیر حسین فقہی شامل ہیں۔

مزید برآں، سپریم لیڈر آیت اللہ علی خامنہ ای کی سیکیورٹی پر مامور القدس فورس کے سربراہ جنرل اسماعیل قانی بھی اس حملے میں شہید ہونے والوں میں شامل ہیں، جس سے اس آپریشن کی سنجیدگی اور اثرات کی شدت کا اندازہ ہوتا ہے۔

یہ حملہ ایران اور اسرائیل کے درمیان بڑھتی ہوئی کشیدگی کا ایک اہم موڑ سمجھا جا رہا ہے، جس کے بعد خطے میں حالات مزید نازک ہو سکتے ہیں۔ اس کارروائی نے ایران کی عسکری صلاحیتوں کو خاصا نقصان پہنچایا ہے اور مستقبل میں دونوں ملکوں کے درمیان کشیدگی میں اضافے کا امکان ہے۔