روزانہ مناسب مقدار میں آم کھانے سے صحت کا اہم فائدہ سامنے آگیا

ایک نئی طبی تحقیق کے مطابق، درمیانی عمر کی خواتین اگر روزانہ معتدل مقدار میں آم کھائیں تو ان کی دل کی صحت میں بہتری آ سکتی ہے۔

'جرنل آف دی امریکن نیوٹریشن ایسوسی ایشن' میں شائع ہونے والی تحقیق کے مطابق، روزانہ تقریباً 330 گرام آم کھانے والی خواتین میں بلڈ پریشر اور کولیسٹرول کی سطح میں کمی دیکھی گئی، جو دل کی بہتر صحت کی علامت ہے۔

تحقیق میں یہ بھی معلوم ہوا کہ آم کھانے سے بلڈ شوگر کی سطح میں تیزی سے اضافہ نہیں ہوتا، جو ذیابیطس کے خطرے کو کم کرنے میں مددگار ہو سکتا ہے۔

مطالعے میں 50 سے 70 سال کی عمر کی 24 ایسی خواتین کو شامل کیا گیا جو موٹاپے یا اضافی وزن کا شکار تھیں۔ دو ہفتوں تک ان خواتین کو روزانہ ڈیڑھ کپ آم کھلائے گئے، اور اس دوران ان کے بلڈ پریشر، کولیسٹرول اور دیگر جسمانی عوامل کا لیبارٹری میں بار بار جائزہ لیا گیا۔

محققین کے مطابق آم کو اس تحقیق کے لیے اس لیے چُنا گیا کیونکہ یہ پھل فائبر، اینٹی آکسائیڈنٹس اور ایسے بائیو ایکٹیو مرکبات سے بھرپور ہوتا ہے، جو دل کی صحت کے لیے فائدہ مند سمجھے جاتے ہیں۔

محققین نے مشاہدہ کیا کہ اگرچہ آم اور سفید ڈبل روٹی دونوں کھانے سے بلڈ شوگر کی سطح میں اضافہ ہوا، لیکن آم کے بعد یہ اضافہ سفید ڈبل روٹی کے مقابلے میں نمایاں طور پر کم تھا۔

اسی طرح، آم کھانے کے بعد انسولین کی سطح میں وقتی اتار چڑھاؤ آیا، جبکہ ڈبل روٹی کھانے کے بعد انسولین کی سطح تقریباً دو گھنٹے تک بلند رہی۔

تحقیق میں یہ نتیجہ اخذ کیا گیا کہ تمام کاربوہائیڈریٹس جسم پر یکساں اثر نہیں ڈالتے۔ اگرچہ آم اور سفید ڈبل روٹی دونوں کاربوہائیڈریٹ پر مشتمل ہیں، لیکن آم زیادہ فائدہ مند ثابت ہوئے اور ان کا اعتدال کے ساتھ استعمال ذیابیطس کے خطرے میں اضافہ نہیں کرتا۔