اسلام آباد (رائیس الااخبار تازہ ترین۔ 10 جون 2025):
پاکستانی سفارتی وفد کے سربراہ بلاول بھٹو زرداری نے کہا ہے کہ پاکستان کا پیغام خطے میں امن کے قیام کے لیے مذاکرات اور ڈپلومیسی ہے۔ ان کا کہنا تھا کہ انشاءاللہ امن کا پیغام جیتے گا جبکہ مودی کا جنگ اور نفرت کا پیغام شکست کھائے گا۔ برطانوی پارلیمنٹ کے ارکان سے ملاقات کے بعد میڈیا سے گفتگو کرتے ہوئے بلاول بھٹو نے کہا کہ امن کے موقف کی سبھی حمایت کرتے ہیں، اور جنگ کی حمایت کوئی نہیں کر سکتا۔

انہوں نے مزید کہا کہ پاکستان اور بھارت کے عوام امن کے خواہاں ہیں اور ہم نفرت اور تقسیم کے بیانیے کو ہمیشہ کے لیے دفن کر دیں گے۔ بلاول بھٹو نے کہا کہ دنیا کے کسی بھی ملک میں انہیں ایسا نہیں کہا گیا کہ وہاں جنگ چاہیے، صرف بھارت کی حکومت اور مودی جنگ چاہتے ہیں، جبکہ امن کے حق میں آواز اٹھانے والے کامیاب ہوں گے۔

بلاول بھٹو نے کہا کہ ہم ماضی کی طرف نہیں بلکہ مستقبل کی طرف دیکھ رہے ہیں، اور خطے میں امن سب کے مفاد میں ہے۔ انہوں نے بھارت سے غیر مشروط اور جامع مذاکرات کا مطالبہ کرتے ہوئے کہا کہ مسئلہ کشمیر اب بھی حل طلب ہے اور جنگ سے نہیں مذاکرات سے مسائل کا حل ممکن ہے۔

برطانوی تھنک ٹینک سے خطاب میں بلاول بھٹو نے کہا کہ مودی حکومت کی جانب سے پانی بند کرنے کی دھمکی جنگ کے مترادف ہے۔ انہوں نے بتایا کہ برطانوی پارلیمانی ارکان نے پاکستان کا موقف غور سے سنا اور وہ سب امن کے حامی ہیں۔ انہوں نے کہا کہ برطانیہ کے بھارت اور پاکستان کے ساتھ تاریخی تعلقات ہیں اور کشمیر مسئلہ تقسیم کا غیرمکمل ایجنڈا ہے۔

بلاول بھٹو نے کہا کہ بھارت کا جنگ پسند بیانیہ جھوٹ، نفرت اور عوام میں تقسیم پھیلانے پر مبنی ہے۔ اگر برطانیہ بھارت سے تجارتی تعلقات استوار کرنا چاہتا ہے تو اسے جنگ روکنی ہوگی کیونکہ پاکستان اور بھارت کی تجارت سے برطانیہ بھی فائدہ اٹھائے گا۔

سربراہ پاکستانی وفد کی قیادت میں برطانوی پارلیمانی انڈر سیکرٹری ہیمش فالکنر سے ملاقات بھی ہوئی جس میں بھارتی فوجی اشتعال انگیزیوں اور خطے میں بڑھتی کشیدگی پر تبادلہ خیال کیا گیا۔