تہران: اسرائیل نے ایران کے خلاف بڑے پیمانے پر فضائی کارروائی کرتے ہوئے 200 لڑاکا طیاروں کی مدد سے 100 سے زائد عسکری اور اسٹریٹجک تنصیبات کو نشانہ بنایا ہے۔ ان حملوں میں پاسدارانِ انقلاب کے سربراہ، ایرانی آرمی چیف، اہم کمانڈوز اور 6 جوہری سائنسدان جاں بحق ہو گئے ہیں، جب کہ فضائی حملوں کے نتیجے میں خواتین اور بچوں سمیت کم از کم 5 شہری جان سے گئے اور متعدد زخمی ہوئے ہیں۔

جمعے کے روز کیے گئے تازہ حملوں میں تبریز ایئرپورٹ اور شیراز شہر کو بھی نشانہ بنایا گیا، جہاں سے دھوئیں کے گہرے بادل اٹھتے دیکھے گئے۔

اسرائیلی وزیر دفاع، یوآف گیلنٹ نے تصدیق کی ہے کہ یہ حملے ایران کی جوہری تنصیبات اور دیگر اہم عسکری مراکز کو نشانہ بنانے کے لیے کیے گئے، اور ان کا مقصد ایران کی عسکری صلاحیتوں کو محدود کرنا ہے۔

 ایران کے سرکاری خبر رساں ادارے ارنا نے تصدیق کی ہے کہ اسرائیلی فضائی حملوں میں ایرانی مسلح افواج کے سربراہ میجر جنرل محمد باقری اور پاسدارانِ انقلاب کے چیف کمانڈر میجر جنرل حسین سلامی جاں بحق ہو گئے ہیں۔ اس کے علاوہ ایرانی ایٹمی توانائی تنظیم کے سابق سربراہ فریدون عباسی، جوہری سائنسدان محمد مہدی تہرانچی، اور خاتم الانبیا ہیڈکوارٹرز کے کمانڈر میجر جنرل غلام علی راشد کی ہلاکت کی بھی تصدیق کی گئی ہے۔

بین الاقوامی خبر رساں ایجنسی رائٹرز کے مطابق اسرائیلی حملوں میں ایران کے کم از کم چھ جوہری سائنسدان ہلاک ہوئے ہیں، جب کہ ایرانی سپریم لیڈر آیت اللہ علی خامنہ ای کے مشیرِ خاص، کمانڈر علی شمخانی، شدید زخمی ہوئے ہیں۔

ایرانی میڈیا کے مطابق حملے میں جاں بحق جوہری سائنسدانوں میں عبدالحمید منوچہر، احمد رضا زلفگاری، سید امیر حسین فقہی، موطبلی زادہ، محمد مہدی تہرانچی اور فریدون عباسی شامل ہیں۔

اسرائیلی فوج کے ترجمان نے دعویٰ کیا ہے کہ ایران پر حملوں میں 200 لڑاکا طیاروں نے حصہ لیا اور 100 سے زائد تنصیبات کو نشانہ بنایا۔ سیکیورٹی ذرائع نے دعویٰ کیا ہے کہ موساد نے حملوں سے قبل ایران میں خفیہ طور پر کارروائیاں کیں اور ایران کے زمین سے فضا میں مار کرنے والے میزائل سسٹم کے مقامات کے قریب درست نشانہ لگانے والے ہتھیار نصب کیے۔

اسرائیلی حملے میں خواتین اور بچوں سمیت 5 ایرانی جاں بحق، درجنوں زخمی

ایرانی سرکاری میڈیا کے مطابق، اسرائیلی فضائی حملوں میں تہران کے رہائشی علاقوں کو نشانہ بنایا گیا، جس کے نتیجے میں 5 شہری جاں بحق اور 20 زخمی ہو گئے۔

ایرانی نیوز چینل پریس ٹی وی نے دعویٰ کیا ہے کہ حملوں کا نشانہ عام شہری علاقوں کو بنایا گیا، جہاں خواتین اور بچوں کی لاشیں دیکھی گئی ہیں۔

تباہ شدہ رہائشی عمارتوں کی تصاویر سرکاری ٹی وی اور عینی شاہدین کی رپورٹوں میں بھی نشر کی گئی ہیں۔

 سوشل میڈیا پلیٹ فارم  پر جاری ویڈیوز میں نطنز (اصفہان) میں اسرائیلی میزائل حملے کے مناظر اور دھماکوں کے بعد اٹھتے ہوئے دھوئیں کے بادل نمایاں طور پر دکھائے گئے ہیں۔

برطانوی میڈیا نے ایرانی سرکاری ٹیلی ویژن کے حوالے سے خبر دی ہے کہ اسرائیلی فضائی حملوں میں دو سینئر جوہری سائنسدان مارے گئے جن کی شناخت کر لی گئی ہے۔

رپورٹ کے مطابق مرنے والوں میں سے ایک ڈاکٹر فریدون عباسی ہیں، جو ایرانی ایٹمی توانائی ادارے (AEOI) کے سابق سربراہ رہ چکے ہیں۔ یہ ادارہ ایران کی جوہری تنصیبات کا ذمہ دار ہے۔

یاد رہے کہ فریدون عباسی پر 2010 میں تہران کی ایک سڑک پر قاتلانہ حملہ بھی کیا گیا تھا، جس میں وہ بچ گئے تھے۔

دوسرے سائنسدان محمد مہدی طہرانچی ہیں، جو تہران میں اسلامی آزاد یونیورسٹی کے صدر کے عہدے پر فائز تھے۔