ایلون مسک دنیا کے امیر ترین شخص ہیں مگر ان کی کمپنی ٹیسلا بطور چیف ایگزیکٹو کام کرنے پر انہیں کتنی تنخواہ دیتی ہے؟

یقین کرنا مشکل ہے، مگر 2024 میں ایلون مسک نے ٹیسلا سے ایک روپیہ بھی تنخواہ نہیں لی

دنیا کے امیر ترین شخص ایلون مسک کو 2024 میں ٹیسلا کی جانب سے بطور چیف ایگزیکٹو کوئی تنخواہ یا مالی معاوضہ نہیں دیا گیا۔ یہ انکشاف وال اسٹریٹ جرنل کی ایک رپورٹ میں سامنے آیا ہے، جس کے مطابق ایلون مسک کو گزشتہ کئی برسوں سے ٹیسلا کی طرف سے کسی قسم کا معاوضہ نہیں مل رہا۔

اس غیر معمولی صورتحال کی وجہ ایک قانونی مقدمہ ہے جو 2018 میں ایک سرمایہ کار، رچرڈ ٹورنیٹا، کی جانب سے دائر کیا گیا تھا۔ اس مقدمے میں موقف اختیار کیا گیا کہ ایلون مسک نے خود اپنی تنخواہ کا پیکج تیار کیا، جو قانونی اور کارپوریٹ اصولوں کی خلاف ورزی ہے۔ عدالت نے اس پر تحفظات کا اظہار کرتے ہوئے 56 ارب ڈالرز پر مشتمل تنخواہ پیکج کو دو مرتبہ مسترد کر دیا۔

رپورٹ کے مطابق 2023 میں ایس اینڈ پی 500 انڈیکس میں شامل کمپنیوں کے تمام سی ای اوز میں ایلون مسک وہ واحد سربراہ تھے جنہیں کسی بھی قسم کا معاوضہ نہیں دیا گیا۔ ایکس (سابقہ ٹویٹر) پر اس حوالے سے ایک صارف کی پوسٹ پر ردعمل دیتے ہوئے ایلون مسک نے تصدیق کی کہ انہیں گزشتہ سات سالوں سے ٹیسلا کی جانب سے کوئی تنخواہ نہیں ملی۔

مسک کا کہنا تھا کہ ان سات سالوں میں ٹیسلا کی مارکیٹ ویلیو میں 2,000 فیصد اضافہ ہوا، مگر اس کے باوجود انہوں نے کوئی مالی فائدہ بطور تنخواہ حاصل نہیں کیا۔

واضح رہے کہ ایلون مسک ٹیسلا کے تقریباً 13 فیصد حصص کے مالک ہیں، اور ان کی دولت کا بڑا حصہ کمپنی کے شیئرز کی مالیت سے منسلک ہے۔ عدالت نے اپنے فیصلے میں کہا ہے کہ ٹیسلا بورڈ نے ایلون مسک کا پے پیکج غیر شفاف انداز میں تیار کیا اور اسے شیئر ہولڈرز سے چھپایا گیا۔

فی الحال عدالتی فیصلے پر عمل درآمد جاری ہے اور ایلون مسک کے معاوضے سے متعلق کوئی نیا پیکج سامنے نہیں آیا۔

۔