راولپنڈی ( بیورو رپورٹ )سٹی ٹریفک پولیس راولپنڈی نے عید الاضحی کی آمد پر اوورلوڈنگ اور زائد کرایہ وصول کرنے والے ٹرانسپورٹرز کے خلاف  کریک ڈان کا آغازکردیا ہے ۔

بدھ کو سی ٹی او راولپنڈی بینش فاطمہ نے تمام ڈی ایس پیز اور سرکل افسران کو احکامات جاری کیے کہ اوورلوڈنگ اور زائد کرایوں   کے خلاف کریک ڈان کا آغاز کیا جائے اور خلاف ورزی کرنے والوں کے ساتھ قانونی کارروائی  کی جائے۔ انہوں نے کہا کہ پبلک سروس ڈرائیورز کو پابند کیا جائے  کہ وہ اپنی گاڑیوں میں گنجائش سے زیادہ مسافر بٹھانے سے گریز کریں ، گاڑیوں میں اپنے کرائے نامے آویزاں کریں اور اڈہ مالکان کو بھی نوٹس جاری کئے جائیں کہ وہ اپنے اڈوں /ٹرمینلز پر کرائے  نامے آویزاں کروائیں تاکہ پردیسیوں کو کسی قسم کی مشکلات کا سامنا نہ کرنا پڑے۔  سی ٹی او راولپنڈی نے تمام ڈی ایس پی سرکلز کو یہ احکامات بھی جاری کیے کہ وہ گاڑیوں کے فٹنس سرٹیفکیٹس اورپی ایس وی ڈرائیورز کے ڈرائیونگ لائسنس چیک کریں اور فٹنس سرٹیفکیٹس گاڑیوں کی ونڈ سکرین پر آویزاں کروائیں۔ انہوں نے کہا کہ  زائد کرایہ وصولی اور اوور لوڈنگ کرنے والوں کے خلاف کارروائی کے لئے خصوصی ٹیمیں تشکیل دی گئی ہیں۔

، سٹی ٹریفک پولیس اپنے فرائض کی بطریق احسن انجام دہی کے لئے پر عزم ہے ۔ پردیسیوں کی محنت کی کمائی پر کسی صورت شب خون مارنے کی اجازت نہیں دی جائے گی۔ انہوں نے کہا کہ پردیسیوں کی باآسانی واپسی کے لئے شہر کے داخلی و خارجی راستوں پر اضافی نفری تعینات کی جائے گی۔