لاہور: پنجاب حکومت آئندہ مالی سال کا بجٹ 13 جون کو پیش کرے گی۔ وزیراعلیٰ پنجاب نے سرکاری ملازمین کی تنخواہوں میں 10 فیصد اور پنشن میں 7 فیصد اضافے کی ابتدائی منظوری دے دی ہے۔

بجٹ کی منظوری کے لیے صوبائی کابینہ کا اجلاس 13 جون کو صبح 11 بجے طلب کر لیا گیا ہے۔ ذرائع کے مطابق آئندہ مالی سال کے لیے 1200 ارب روپے کے ترقیاتی بجٹ کا ڈرافٹ وزیراعلیٰ کو پیش کیا گیا ہے۔

ترقیاتی منصوبوں کے لیے مجموعی طور پر 2,750 اسکیموں کا خاکہ تیار کیا گیا ہے، جن پر 1076 ارب روپے مقامی ذرائع سے اور 124 ارب 30 کروڑ روپے غیر ملکی فنڈنگ سے خرچ کیے جائیں گے۔

بجٹ میں 1,412 جاری ترقیاتی اسکیموں کے لیے 536 ارب روپے مختص کیے جائیں گے، جبکہ وزیراعلیٰ کی جانب سے لوکل روڈ پروگرام بلاک کے لیے 100 ارب روپے رکھنے کی تجویز دی گئی ہے۔

اس کے علاوہ:

• تحصیل ہیڈکوارٹر اسپتالوں کی سولر توانائی پر منتقلی کے لیے 1 ارب روپے

• صاف پانی اتھارٹی کے لیے 4 ارب 34 کروڑ 71 لاکھ روپے

• ٹریکٹر اسکیم کے لیے 10 ارب روپے

• آسان کاروبار فنانس پروگرام کے لیے 89 ارب روپے مختص کرنے کی تجاویز شامل کی گئی ہیں۔

مزید برآں، بجٹ میں پنجاب الیکٹرک پاور ریگولیٹری اتھارٹی کے قیام کا اعلان بھی متوقع ہے، جو توانائی کے شعبے میں شفافیت اور مؤثر نگرانی کے لیے کام کرے گی۔