اسلام آباد: سپریم کورٹ نے نور مقدم قتل کیس میں ظاہر جعفر کی سزائے موت برقرار رکھنے کا تحریری فیصلہ جاری کر دیا۔

تفصیلی فیصلے میں کہا گیا ہے کہ دونوں نچلی عدالتوں کے فیصلے درست قرار دیے جاتے ہیں، ظاہر جعفر ہمدردی کے قابل نہیں اور وہ نور مقدم کا بے رحم قاتل ہے۔

عدالتی فیصلے میں مزید بتایا گیا کہ نور مقدم پر جسمانی تشدد کی سی سی ٹی وی ویڈیو، ڈی وی آر اور ہارڈ ڈسک قابل قبول شہادتیں ہیں، ویڈیو میں کوئی ترمیم نہیں ہوئی اور ملزم کی شناخت بھی درست ثابت ہوئی ہے۔

سپریم کورٹ نے فیصلے میں کہا کہ ڈی این اے رپورٹ سے زیادتی کی تصدیق ہوئی ہے اور آلہ قتل پر مقتولہ کا خون بھی موجود ہے، جبکہ ظاہر جعفر نور مقدم کی موجودگی کی کوئی وضاحت نہ دے سکا۔

عدالتی حکم کے مطابق ظاہر جعفر کی قتل کی سزا سزائے موت برقرار رکھی گئی ہے اور زیادتی کی سزا عمر قید میں تبدیل کی گئی ہے۔

کیس کا پس منظر:
ظاہر جعفر نے 2021 میں اسلام آباد میں نور مقدم کو تشدد کے بعد قتل کیا تھا۔ ٹرائل کورٹ نے اسے سزائے موت سنائی، جسے اسلام آباد ہائیکورٹ نے بھی برقرار رکھا۔ ظاہر جعفر نے اس فیصلے کے خلاف سپریم کورٹ میں اپیل کی تھی، جسے عدالت نے مسترد کر دیا۔