پاکستان اور بھارت کا امن دنیا کے مفاد میں ہے، امریکا کو بھارت کو مذاکرات کے لیے کان سے پکڑ کر لانا پڑا تو لائے

 چیئرمین پیپلزپارٹی بلاول بھٹو زرداری نے کہا ہے کہ اگر بھارت مذاکرات پر آمادہ نہ ہوا تو امریکا کو اسے زبردستی مذاکرات کی میز پر لانا چاہیے، کیونکہ پاکستان اور بھارت کا امن پوری دنیا کے مفاد میں ہے۔

لندن میں پارلیمانی وفد کے ساتھ پریس کانفرنس کرتے ہوئے بلاول بھٹو نے کہا کہ پاکستان نے متعدد بار بھارت سے دہشتگردی کے ثبوت مانگے، لیکن بھارت ایک بھی قابلِ قبول ثبوت پیش نہیں کر سکا۔ اسے بھی معلوم ہے کہ پاکستان کا دہشتگردی سے کوئی تعلق نہیں۔

انہوں نے کہا کہ بھارت کی تمام کوششیں ناکام ہوں گی، ہم ہر صورت امن قائم کریں گے۔ پاکستان چاہتا ہے کہ دہشتگردی، کشمیر اور پانی سمیت تمام مسائل بات چیت سے حل ہوں۔

بلاول نے امریکی صدر ٹرمپ کا شکریہ ادا کرتے ہوئے کہا کہ انہوں نے بھی کئی بار کشمیر پر مذاکرات کی ضرورت پر زور دیا۔ اگر بھارت کو مذاکرات کے لیے کان سے پکڑ کر بھی لانا پڑے تو امریکا کو ایسا کرنا چاہیے، کیونکہ خطے کا امن عالمی مفاد سے جڑا ہے۔

چیئرمین پیپلز پارٹی نے بھارت پر الزام لگاتے ہوئے کہا کہ وہ سکھوں کے خلاف منظم مہم چلا رہا ہے اور پاکستان میں دہشتگردی کروانے میں ملوث ہے۔ بھارت سے مطالبہ ہے کہ وہ بیرون ملک دہشتگردی بند کرے۔

انہوں نے مزید کہا کہ بھارت کی جانب سے پاکستان کا پانی بند کرنے کی دھمکی اقوامِ متحدہ کے چارٹر کی خلاف ورزی ہے۔ حالیہ جنگ نے ثابت کیا کہ پاکستان، سائز میں چھوٹا ہونے کے باوجود، ہر میدان میں بھارت کو شکست دے سکتا ہے۔

جنرل عاصم منیر کی خدمات کو سراہتے ہوئے بلاول نے کہا کہ فتح کے بعد انہیں فیلڈ مارشل کا عہدہ دینا ان کی قائدانہ صلاحیتوں کا اعتراف ہے۔