مصری حکام نے غزہ کی جانب عالمی مارچ سے قبل 200 سے زائد فلسطین حامی کارکنوں کو گرفتار کر لیا۔

غیر ملکی خبررساں ادارے کے مطابق مارچ کے منتظمین کا کہنا ہے کہ قاہرہ ایئرپورٹ پر متعدد کارکنوں کو حراست میں لیا گیا یا ان سے تفتیش کی گئی۔ زیرِ حراست افراد میں امریکا، آسٹریلیا، نیدرلینڈز، فرانس، اسپین، مراکش اور الجزائر سمیت کئی ممالک کے شہری شامل ہیں۔

منتظمین کے مطابق سادہ لباس پولیس اہلکاروں نے قاہرہ کے مختلف ہوٹلوں پر چھاپے مارے، مارچ میں شرکت کے لیے آئے افراد سے تفتیش کی، ان کے موبائل فونز ضبط کیے اور سامان کی تلاشی لی گئی۔

پولیس نے تفتیش کے بعد بعض افراد کو حراست میں لے لیا، جب کہ دیگر کو رہا کر دیا گیا۔

قاہرہ میں پریس کانفرنس کرتے ہوئے مارچ کے منتظمین نے بتایا کہ 40 ممالک سے تعلق رکھنے والے 4 ہزار سے زائد کارکن مصر آنے کا ارادہ رکھتے ہیں، جن میں سے بڑی تعداد پہلے ہی پہنچ چکی ہے۔

یہ مارچ غزہ پر اسرائیلی ناکہ بندی کے خاتمے اور امدادی سامان پہنچانے کے لیے جمعہ کے روز شروع ہوگا۔ شرکاء بسوں کے ذریعے سکیورٹی کے لحاظ سے حساس علاقے العریش جائیں گے، جہاں سے وہ پیدل 50 کلومیٹر کا سفر طے کر کے رفح سرحدی کراسنگ پہنچیں گے اور وہاں احتجاجی کیمپ قائم کریں گے۔

دوسری جانب اسرائیل نے مصر سے مطالبہ کیا ہے کہ وہ مظاہرین کو سرحد تک پہنچنے سے روکے۔ اسرائیلی وزیر دفاع نے خبردار کیا ہے کہ ایسے اقدامات اسرائیلی فوج کی سکیورٹی کے لیے خطرہ بن سکتے ہیں اور انہیں برداشت نہیں کیا جائے گا۔

مصر کی وزارت خارجہ کا کہنا ہے کہ وہ غزہ کا محاصرہ ختم کرنے کے لیے اسرائیل پر دباؤ ڈالنے کی کوششوں کی حمایت کرتا ہے، تاہم کسی بھی غیر ملکی وفد کو سرحدی علاقوں میں جانے کے لیے سرکاری اجازت حاصل کرنا ضروری ہے۔