انہوں نے کہا کہ اسٹاک مارکیٹ میں زبردست تیزی سرمایہ کاروں اور کاروباری طبقے کے اُس اعتماد کی علامت ہے، جو انہوں نے حالیہ عوام دوست بجٹ پر ظاہر کیا ہے۔

وزیرِ اعظم کا کہنا تھا کہ حکومت نے بجٹ میں عام آدمی پر ٹیکس کا اضافی بوجھ نہیں ڈالا۔ تنخواہوں میں اضافہ اور ٹیکس میں کمی سے تنخواہ دار طبقے کو ریلیف فراہم کیا گیا ہے۔

انہوں نے مزید کہا کہ الحمدللہ، پاکستان نے معاشی ترقی کی سمت میں پیش قدمی شروع کر دی ہے۔ یہ سفر عوام کی قربانیوں اور صبر کا نتیجہ ہے۔ اب وقت آ گیا ہے کہ ہم سب مل کر عام شہری کی زندگی کو بہتر بنانے کے لیے محنت کریں۔

شہباز شریف نے کہا کہ مہنگائی کی شرح میں کمی، زرمبادلہ کے ذخائر میں اضافہ، ترسیلات زر اور برآمدات کی بہتری حکومت کی معاشی ٹیم کی دن رات کی محنت کا ثمر ہے۔

وزیرِ اعظم نے پاکستان کو ڈیفالٹ کے دہانے سے واپس لانے کو ایک معجزہ قرار دیا اور کہا کہ موجودہ معاشی استحکام اور ترقی کا آغاز ایک تاریخی سنگِ میل ہے۔

انہوں نے کہا کہ یہ مثالی معاشی بحالی معاشی ٹیم کی محنت اور ملک کے مفاد کو ترجیح دینے کے باعث ممکن ہوئی، اور اس کا تذکرہ تاریخ میں سنہری الفاظ میں کیا جائے گا۔