اسلام آباد: چیئرمین سینیٹ اور اسپیکر قومی اسمبلی کی تنخواہوں میں بھاری اضافے کے معاملے میں نئی تفصیلات سامنے آگئیں۔

ذرائع کے مطابق چیئرمین سینیٹ اور اسپیکر نے خود اپنی تنخواہوں میں اضافے کا فیصلہ کیا۔ چیئرمین اور ڈپٹی چیئرمین سینیٹ کی تنخواہوں میں اضافہ سینیٹ کی ہاؤس فنانس کمیٹی نے کیا، جبکہ اسپیکر اور ڈپٹی اسپیکر کی تنخواہوں میں اضافہ قومی اسمبلی کی ہاؤس فنانس کمیٹی نے منظور کیا۔

ذرائع کے مطابق چیئرمین سینیٹ یوسف رضا گیلانی نے چند ماہ قبل سینیٹ کی ہاؤس فنانس کمیٹی کے اجلاس کی صدارت کی، جبکہ سردار ایاز صادق نے چند ماہ قبل قومی اسمبلی کی ہاؤس فنانس کمیٹی کا اجلاس چلایا۔

دونوں الگ الگ اجلاسوں میں 4 افراد کی تنخواہوں میں اضافے کا فیصلہ خاموشی سے کیا گیا۔

ذرائع کا کہنا ہے کہ حکومت کا قومی اسمبلی اور سینیٹ کے مالی معاملات سے کوئی تعلق نہیں ہوتا، حکومت دونوں ایوانوں کو بجٹ فراہم کرتی ہے اور ان کے استعمال میں دونوں ایوان خود مختار ہیں۔ قانون کے مطابق وزیراعظم قومی اسمبلی اور سینیٹ کے داخلی معاملات میں مداخلت نہیں کر سکتے۔

تاہم وزیراعظم شہباز شریف نے اس معاملے کا نوٹس لیا ہے اور متعلقہ حکام سے رپورٹ طلب کی ہے۔ وزیراعظم اخلاقی طور پر متعلقہ شخصیات کو پیغام دے سکتے ہیں یا کابینہ سے سفارشات لے سکتے ہیں، لیکن حتمی فیصلہ ہاؤس فنانس کمیٹی کا ہوگا۔

گذشتہ روز پوسٹ بجٹ پریس کانفرنس میں وزیر خزانہ نے وزرا، ارکان پارلیمنٹ، چیئرمین اور اسپیکر کی تنخواہوں میں اضافے کا دفاع کرتے ہوئے کہا کہ ان کی تنخواہوں میں 2016 سے کوئی اضافہ نہیں ہوا۔

دوسری جانب وزیر دفاع خواجہ آصف نے سوشل میڈیا پر ان مراعات اور تنخواہوں میں اضافے کو مالی فحاشی قرار دیا ہے۔

واضح رہے کہ آئندہ مالی سال کے بجٹ میں سرکاری ملازمین کی تنخواہوں میں 10 فیصد اور پنشن میں 7 فیصد اضافہ کیا گیا ہے، جس کے بعد اسپیکر اور چیئرمین سینیٹ کی بھاری تنخواہوں میں اضافے پر شدید تنقید ہو رہی ہے۔