ایرانی صدر ڈاکٹر مسعود پزشکیان نے اسرائیلی حملے کی شدید مذمت کرتے ہوئے کہا ہے کہ ہم ظلم کے سامنے خاموش نہیں رہیں گے۔

ایرانی خبر رساں ایجنسی کے مطابق صدر ڈاکٹر مسعود پزشکیان نے ایران پر اسرائیل کے حالیہ حملے کی شدید مذمت کرتے ہوئے کہا ہے کہ ایران کا قانونی اور فیصلہ کن جواب دشمن کو اس کے احمقانہ اقدام پر پشیمان کر دے گا۔ انہوں نے زور دیا کہ آج ایرانی عوام کو پہلے سے کہیں زیادہ اتحاد اور باہمی اعتماد کی ضرورت ہے، کیونکہ یہی جذبہ ہمیں اس مجرمانہ حملے کا سخت اور مؤثر جواب دینے کے قابل بنائے گا۔

صدر پزشکیان نے کہا کہ گزشتہ شب صہیونی حکومت نے تہران اور ملک کے دیگر شہروں پر وحشیانہ حملہ کیا، جس کے نتیجے میں بےگناہ بچے، خواتین، عام شہری، فوجی کمانڈرز اور جوہری سائنسدان شہید ہوئے۔ انہوں نے اس حملے کو صہیونی حکومت کی بربریت اور ظلم کی اصل حقیقت قرار دیا، جسے ایران برسوں سے بیان کرتا آ رہا ہے۔

انہوں نے مزید کہا کہ ایران اس جارحیت اور بزدلانہ حملے کے سامنے نہ تو خاموش بیٹھے گا اور نہ ہی اسے نظر انداز کرے گا۔ ایران نے ہمیشہ عالمی اور علاقائی امن کے لیے مذاکرات اور اعتماد سازی کی کوشش کی ہے، لیکن اب وقت آ گیا ہے کہ اپنی خودمختاری کے دفاع کے لیے سخت اور مؤثر عملی اقدامات کیے جائیں۔

صدر پزشکیان نے ایرانی عوام سے اپیل کی کہ وہ متحد رہیں، دشمن کی جانب سے پھیلائی جانے والی افواہوں اور نفسیاتی جنگ کا شکار نہ ہوں، حکومتی اداروں پر مکمل اعتماد رکھیں اور ایک باشعور اور متحد قوم کی طرح ان مشکل حالات سے گزرنے کے لیے تیار رہیں۔ انہوں نے کہا کہ اتحاد اور یکجہتی ہی وہ قوت ہے جو ایران کو اس بحران سے باہر نکالے گی اور دشمن کو اس کے غلط اقدامات کا منہ توڑ جواب دے گی۔