وزیرِ دفاع خواجہ آصف نے ایران پر اسرائیلی حملے کی مذمت کرتے ہوئے کہا ہے کہ اگر مسلم دنیا نے اب بھی اتحاد نہ کیا تو کل کو ہر کسی کی باری آئے گی۔

قومی اسمبلی کے بجٹ اجلاس کی صدارت اسپیکر ایاز صادق نے کی، جس میں خطاب کرتے ہوئے خواجہ آصف نے کہا کہ یہاں بجٹ پر بات ہو رہی ہے، لیکن کل ہمارے ہمسایہ ملک ایران پر حملہ ہوا۔ ایران ہمارا برادر اسلامی ملک ہے، جس سے ہمارے بہت گہرے اور پرانے تعلقات ہیں۔

انہوں نے کہا کہ ایران کے ساتھ ہمارے ایسے رشتے ہیں جن کی مثال تاریخ میں کم ہی ملتی ہے۔ اسرائیل نے یمن، ایران اور فلسطین کو نشانہ بنایا ہوا ہے۔ اگر آج مسلم دنیا اکٹھی نہ ہوئی تو کل سب کو اسی طرح کا سامنا کرنا پڑے گا۔ اب وقت ہے کہ ہم مل کر کچھ عملی قدم اٹھائیں۔

خواجہ آصف نے کہا کہ موجودہ صورتحال میں فوری طور پر اسلامی ممالک کی تنظیم (او آئی سی) کا اجلاس بلایا جانا چاہیے۔ اسرائیل فلسطینیوں پر ظلم کر رہا ہے، لیکن اسلامی دنیا سے اس ظلم کے خلاف ویسی آواز نہیں اٹھ رہی جیسی باقی دنیا سے اٹھ رہی ہے۔ افسوس کی بات ہے کہ غیر مسلموں کا ضمیر جاگ چکا ہے، لیکن مسلمانوں کا ضمیر اب تک سویا ہوا ہے۔

عمران خان اور سابق آرمی چیف جنرل قمر جاوید باجوہ پر تنقید کرتے ہوئے انہوں نے کہا کہ ایک میٹنگ ہوئی تھی، ہم انتظار کرتے رہے کہ اُس وقت کے وزیر اعظم آئیں۔ پھر ابھی نندن کو واپس کیا گیا، جو ایک طرح سے ہتھیار ڈالنے جیسا تھا۔ اس فیصلے سے اُس وقت کے آرمی چیف اور وزیراعظم نے ملک کی عزت کو نقصان پہنچایا۔

خواجہ آصف نے کہا کہ ہمیں بھارت کے ساتھ جنگ میں کامیابی پر ہمیشہ فخر رہے گا۔ وزیر خزانہ نے جو ایک سال میں حاصل کیا، اُس پر میں اُنہیں داد دیتا ہوں۔ انہوں نے بین الاقوامی اداروں کا پاکستان پر اعتماد بحال کیا۔ شہباز شریف اور وزیر خزانہ کی قیادت میں ہم نے ایک لمبا سفر طے کیا ہے۔

انہوں نے مزید کہا کہ صرف ایک شخص کو ساری سیاست کا مرکز بنانا حب الوطنی نہیں بلکہ شخصی عقیدت ہے۔ پاکستان میں بہت بڑی شخصیات آئیں اور چلی گئیں، لیکن وطن باقی رہا۔ نئی قیادت تیار کریں تاکہ آپ کی جماعت زندہ رہے۔ یہ سیاست ہے، کوئی درگاہ نہیں کہ صرف ایک ہی شخص گدی نشین بنا رہے۔ الیکشن کو ڈیڑھ سال ہو گیا ہے اور اب بھی ایک ہی راگ الاپا جا رہا ہے، جو بےسُرا ہو چکا ہے۔