اسلام آباد:وزیراعظم محمد شہباز شریف اور ترک صدر رجب طیب اردوان کے درمیان ٹیلیفونک رابطہ ہوا جس میں دونوں رہنماؤں نے ایران کے خلاف اسرائیل کی جارحیت کے نتیجے میں خطے کی تشویشناک صورتحال پر تبادلہ خیال کیا۔

دونوں رہنماؤں نے اس بات پر اتفاق کیا کہ اسرائیل کے حملے ایران کی خودمختاری اور علاقائی سالمیت کی صریح خلاف ورزی ہیں، جو اقوام متحدہ کے چارٹر اور بین الاقوامی قوانین کے منافی ہیں، اور جو علاقائی و عالمی امن و استحکام کو شدید خطرات سے دوچار کر دیا ہے۔ انہوں نے فلسطینی عوام کے خلاف اسرائیل کی جاری کھلی جارحیت کی بھی سخت مذمت کی
دونوں رہنماؤں نے زور دیا کہ عالمی برادری اور اقوام متحدہ، ایران، فلسطین اورخطے کے دیگر ممالک کے خلاف اسرائیلی جارحیت اور غیر قانونی کارروائیاں فوری بند کرائے۔وزیراعظم محمد شہباز شریف نے عالمی امن، سلامتی اور استحکام کے لیے پاکستان کے غیر متزلزل عزم کا اعادہ کیا۔ انہوں نے کہا کہ پاکستان بطوراقوام متحدہ کی سلامتی کونسل کے رکن اور اسلامی تعاون تنظیم (او آئی سی) جیسے دیگر فورمز پر بھی امن کے لیے تعمیری کردار ادا کرتا رہے گا۔
وزیراعظم نے کہا کہ استنبول میں ہونے والے او آئی سی وزرائے خارجہ اجلاس میں پاکستان کی نمائندگی نائب وزیر اعظم محمد اسحاق ڈار کریں گے۔ انہوں نے صدر اردوان کو اسلامی تعاون تنظیم یوتھ فورم (ائی سی وآئی ایف) کی جانب سے اعزاز سے ملنے پر مبارکباد بھی دی۔
دونوں رہنماؤں نے خطے کی موجودہ صورتحال کے تناظر میں اپنے ممالک کی سفارتی کوششوں سے ایک دوسرے کو آگاہ کیا، اور امن کی کوششوں میں قریبی رابطے میں رہنے پر اتفاق کیا۔