حکومتِ پاکستان نے ایرانی حالات کے پیشِ نظر پاکستانی شہریوں کے لیے نئی ٹریول ایڈوائزری جاری کر دی ہے۔

وزارتِ داخلہ کی جانب سے جاری بیان میں کہا گیا ہے کہ اسرائیلی حملوں کے باعث پاکستانی شہری فی الحال ایران کا سفر نہ کریں۔

اعلامیے میں کہا گیا ہے کہ حکومت اپنے شہریوں کی حفاظت کو اولین ترجیح دیتی ہے اور حالات پر مسلسل نظر رکھے ہوئے ہے۔

وزارتِ داخلہ کا مزید کہنا ہے کہ جو پاکستانی اس وقت ایران میں موجود ہیں، ان کی بحفاظت واپسی کے لیے اقدامات کیے جا رہے ہیں۔

یاد رہے کہ گزشتہ روز اسرائیلی فوج نے ایران پر بڑے حملے کیے، جن میں 9 سائنسدانوں اور اعلیٰ عسکری شخصیات سمیت 80 سے زائد افراد شہید ہوئے۔ جواب میں ایران نے بھی اسرائیل پر جوابی حملہ کرتے ہوئے 200 سے زائد بیلسٹک میزائل فائر کیے، جن سے 4 اسرائیلی ہلاک اور 90 سے زائد زخمی ہو گئے۔

وزیراعظم پاکستان نے اس موقع پر ایرانی صدر سے بات کرتے ہوئے اسرائیلی جارحیت کے خلاف مکمل یکجہتی کا اظہار کیا۔